زجل        في أيّار جَمع اغمار    بقلم: أسماءطنوس المكر

 

أيّار شهر الخير يا جَنى الخَيْرات


 
فَرحِة التّعبــان في جَمـع غِـلّاتُه

عَبَيْدرُه الفلّاح عَم يُحصد القمحات

بيُشكر إله الكون المِعطي رِزقاتُه

جَمّع غِلال القَمح من تَعَب هَالدّيّات

واللّي بيِسعى للنّجاح ما تخيب نيّاتُه

واللّي بَذَل مجهودُه تَيِكبروا الزّرعات

جالُه الفرح اليـوم يِغسِلُّــه دمعــاتُه

ياللّي من جبينُــه نِزل العَــرَق زَخّــات

أيّار نَسّاهُ التّعب رَجّعلُـه فرحـــاتُه

شو مَرْقَت عليهِ ايّام مخنوق بِالضّيقات

جالُه الفَرَج بالصَّبر مع طول آناتُه

وال عندُه كرامِه ما بيقول كِلمِـــة هات

عِزِّة النّفْس اللّي فِيّو بتِخـفي آهـاتُــه

تْعلَّم يا أخــي النّشــاط  منِ النّــمــلات

بِتقَضّي طول الصّيف تَتْلِمّ حبّاتُــه

وِتْمَلّي المخازِن للشّتي للمونِه والأكلات

وصِرصار قاعد مِلتِهي طربان بِغِنواتُه

وقت الشّتي والبرد ما بيلاقي شي يِقْتات

بيــروح للنّمـــلات يشتِكـي منِ الجــوع

بيِحكيلا كيف جسمُه هَزَل تتلَبّـي حاجاتُه

 

 

المقالات المنشورة تعبر عن رأي كاتبها فقط، وموقع الملتقى بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير نأمل ان تعجبكم